Байгаль орчинд нөлөөлөх байдлын үнэлгээний тухай хуулийн 3.1.6-д зааснаар байгаль орчны нөлөөллийн “нарийвчилсан” үнэлгээ гэж иргэн, аж ахуйн нэгж, байгууллагаас тодорхой төслийг хэрэгжүүлэх явцад байгаль орчинд учруулж болзошгүй сөрөг нөлөөлөл, үр дагаврыг урьдчилан тодорхойлж, түүнийг бууруулах, арилгах арга хэмжээ тогтоохыг хэлнэ.

Байгаль орчны нөлөөллийн нарийвчилсан үнэлгээний гол зорилт нь иргэн, аж ахуйн нэгж, байгууллагаас хэрэгжүүлж байгаа тодорхой төслийг хэрэгжүүлэх явцад тухайн нутаг дэвсгэрийн байгаль орчин, нийгэм, оршин суугчдын эрүүл мэндэд учруулж болзошгүй сөрөг нөлөөллийг тодорхойлох, үнэлэх, түүний сөрөг үр дагавар, түүнээс урьдчилан сэргийлэх, зайлсхийх, бууруулах, арилгах арга хэмжээг тогтоох явдал юм.

Байгаль орчны нөлөөллийн нарийвчилсан үнэлгээний ажил нь үе шатуудаас бүрдэнэ. Үүнд:

• Нөлөөллийн нарийвчилсан үнэлгээний ажлын удирдамжийг боловсруулах

• Төслийн болзошгүй болон гол сөрөг нөлөөллийг тодорхойлох

• Болзошгүй болон гол сөрөг нөлөөллийг үнэлэх

• Төслийн сөрөг нөлөөлөл багатай хувилбарыг сонгох

• Сөрөг нөлөөллөөс урьдчилан сэргийлэх, бууруулах, үр дагаврыг арилгах арга хэмжээг тодорхойлох

• Нөхөн сэргээх болон дүйцүүлэн хамгаалах арга хэмжээг тогтоох

• Төслийн үйл ажиллагаанаас байгаль орчин, нутгийн оршин суугчдад учирч болзошгүй эрсдэлийн үнэлгээг хийх

• Байгаль орчны менежментийн төлөвлөгөөний гол зорилт, хамрах хүрээ шалгуур үзүүлэлтүүд

• Нөлөөллийн нарийвчилсан үнэлгээний тайлан, түүний техникийн бус хураангуйг боловсруулах зэрэг орно

• Төсөл хэрэгжүүлэгчид нөлөөллийн нарийвчилсан үнэлгээний тайланг танилцуулж санал авах

• Нөлөөллийн нарийвчилсан үнэлгээний тайланг төсөл хэрэгжиж буй баг, хорооны Иргэдийн нийтийн хуралд танилцуулж, хэлэлцүүлэх

• Нөлөөллийн нарийвчилсан үнэлгээний тайланг Байгаль орчин, Аялал жуулчлалын яаманд (БОАЖЯ) хүргүүлж үнэлгээний шинжээчээр шүүмж гаргуулах

• Нөлөөллийн нарийвчилсан үнэлгээний тайланг БОАЖЯ-ны Байгаль орчны үнэлгээний мэргэжлийн зөвлөлийн хурлаар хэлэлцүүлж батлуулах.

Төслийн байгаль орчин, нийгмийн нөлөөллийн нарийвчилсан үнэлгээний дүнд тодорхойлогдсон гол болон болзошгүй сөрөг нөлөөллүүд, түүнээс урьдчилан сэргийлэх, бууруулах, дүйцүүлэн хамгаалах арга хэмжээ, төслийн үйл ажиллагаанаас тухайн нутаг дэвсгэрийн байгаль орчин, оршин суугчдад учирч болзошгүй эрсдэлийн үнэлгээний дүн, түүнээс урьдчилан сэргийлэх арга хэмжээ, байгаль орчны менежментийн төлөвлөгөөний гол зорилт хамрах хүрээ, шалгуур үзүүлэлтүүдийг эмхэтгэн тайлагнах нь энэ үе шатны гол ажил бөгөөд төслийн байгаль орчин, нийгмийн нөлөөллийн нарийвчилсан үнэлгээний тайлан гол үр дүн болно.